INKANTOLO eNkulu yaseThekwini isichithile isicelo ebesifakwe yiSouthern Africa Refugee Organization Forum, okuyinhlangano emele abakufika abakuleli zwe.
Le nhlangano ibifake isicelo sokuthi umnyango wamaphoyisa nowezempilo, noNgqongqoshe wezeMpilo KwaZulu-Natal, uNkk Nomagugu Simelane-Mngadi, bangenelele njengoba bethi abokufika, ngisho abanamaphephamvume okuba kuleli, bayavinjwa ukungena ezikhungweni zezempilo zikahulumeni.
Izinhlangano i-Operation Dudula neMarch on March, ziqale umkhankaso wokuvimbela abakuleli ngokungemthetho ukusebenzisa imitholampilo nezibhedlela zikahulumeni, njengoba zithi bayimbangela yokushoda kwezinsiza ezikhungweni. Kuthiwa bezifuna wonke umuntu ongena khona aveze umazisi.
Abokufika bathi abanye abahlengikazi, babaphindisela emuva uma beyofuna usizo lwempilo ezibhedlela. Bathi i-Operation Dudula neMarch on March ngabe abakwenzi lokhu ukuba amaphoyisa aqinisa isandla, nomnyango wezempilo uthathe izinyathelo njengoba kuyizona izinhlaka ezigunyazwe wuMthethosisekelo wezwe.
Ummeli kahulumeni, uMnu Yogesh Hulasi, uthi inhlangano yabokufika ifuna usizo nencazelo ezinhlakeni okungeyizo. Uthe kufanele ngabe le nhlangano ifuna isivimbelo senkantolo sokuvimba i-Operation Dudula neMarch on March.
Izinhlangano i-Operation Dudula, neMarch on March, zivimbe abakufika ebebengena emitholampilo nasezibhedlela, eGauteng, naKwaZulu-Natal, befuna wonke umuntu ongena khona akhiphe umazisi.
UMeli kaHulumeni, uMnu Yogesh Hulasi, uthi inhlangano yabokufika ifuna usizo nencazelo ezinhlakeni okungeyizo ngoba ifanele ibhekane ne-Operation Dudula neMarch on March, okuyizona ezibahluphayo.
