KUQHUME umkikizo wenjabulo ehholo laseMaoti eNanda, eThekwini kwethulwa uKhomishana wamaPhoyisa waseKZN, uBrigadier Nhlanhla Mkhwanazi osematheni kulezi zinsuku ngenxa yomsebenzi owenziwa ngamaphoyisa awaholayo.
UMkhwanazi uyingxenye yeziphathimandla eziphuma eminyangweni eyahlukene KwaZulu-Natal ezimenywe nguNdunankulu walesi sifundazwe, uMnu Thami Ntuli.
UMnu Ntuli umeme zonke izinhlaka ukuba zizokhuluma ukuze kutholakale ikhambi lokulwa nobugebengu obudla lubi ezindaweni ezahlukene ikakhulukazi kulona ilokishi iNanda. Le mbizo ihanjelwe ngamalungu omphakathi kanye namalungu ezinhlaka zezokuphepha emiphakathini.
UMnu Ntuli uhambisana nongqongqoshe bemnyango yekhabhinethi ayiholayo okukhona kubona uNkk Thembeni Madlopha-Mthethwa onguNgqongqoshe wezoLimo nokuThuthukiswa kweziNdawo zaseMakhaya, uNkk Nomagugu Simelane onguNgqongqoshe wezeMpilo, uMajor General Mnikelwa Nxele onguKhomishana wezemaJele kuleli. Phakathi kwabanye abaholi kukhona neNkosi Mqoqi Ngcobo nayo okulindeke ukuba ibe nezwi maqondana nale mbizo.
Uhlelo luphethwe nguMfu. Thulasizwe Buthelezi onguNgqongqoshe woMnyango wezokuBusa ngokuBambisana nezoMdabu KwaZulu-Natal.
Amalungu omphakathi akhulume naleliphephandaba ngaphambi kokuqalwa kohlelo lwembizo aveze ukuthi ayilindele ngabomvu inkulumo kaMkhwanazi. Lokhu kufakazeleke ngesikhathi ethulwa njengabanye abaholi. Kwethulwa abaholi izethameli bezishaya izandla kuphela kodwa kube nomehluko omkhulu ngenkathi kwethulwa uMkhwanazi.
