MEZI JELE
APHELILE amaphupho nokuqagela uMnu uDo-nald Trump, ulunqobile ukhetho luka-2024 lokwengamela izwe laseMelika.
UTrump (78), wamaRepublicans, wehlule uNkk Kamala Harris wamaDemocrats, obekuyiwona abephethe izintambo zombuso zakuleliya lizwe eliyisikhondlakhondla emhlabeni.
Enkulumweni yakhe yokubonga ukunqoba ayethule eFlorida izolo ngoLwesithathu, uTrump uthe uzoyelapha iMelika futhi ayipende kabusha.
“Sizolelapha leli zwe lethu, ukunqoba lokhu izwe lethu elingakaze libe nakho ngapha-mbilini,” esho.
Badumele abantu baseMelika ebebezitshela ukuthi izwe labo lizokuba nomengameli wesifazane wokuqala emlandweni walo.
Ngemuva kokumenyezelwa kokunqoba kukaTrump, bekuchwaza eMelika, njengoba ezidlele amahlanga ePennyslvania, eGeorgia, eNorth Carolina, naseFlorida.
UTrump usebuyela okwesibili eWhite House njengoba akhishwa nguMnu uJoe Biden wamaDemocrats ngo-2020.
Amanye amazwe ase-Europe, e-Asia nase-Africa, ayaqhaqhazela ngokunqoba kukaTrump, ngoba uyaziwa ukuthi akalali endleleni, uyindoda ebeka izwe layo phambili.
I-dollar laseMelika lenyukile kanti irandi laseNingizimu Afrika lithole ukuntengantenga ngemuva kokuzwakala kokunqoba kukaTrump. Izinguquko ezizolethwa nguTrump zibhekwe ngabomvu umhlaba wonke.
