LIMGOJELE obengumsakazi woKhozi FM uSiyabonga “Siya” Mhlongo, obebhekene necala lokushaya ngenhloso yokulimaza owesilisa owayeyisinqandamathe sakhe.
UMhlongo ubevele eNkantolo yeMantshi yaseThekwini lapho elahlwe khona yicala lokushaya uMnu Njabulo Duma ngebhodlela leSavannah, esigamekweni okuthiwa senzeka ngo-August wonyaka ophelile. Lesi sinqumo kwakulindeleke ukuthi sikhishwe ngomhla ka-20 wenyanga eyedlule, kodwa kwangenzeka ngenxa yezinkinga zobuchwepheshe bemishini yase nkantolo.
Ubufakazi bombuso buveze ukuthi uSiya washaya uDuma ngebhodlela ebusweni ngemuva kwengxabano eyasuswa wukuvalelisana kwakhe (uDuma) nomunye wesilisa ngokuthi mncwa mncwa, nokuyikho okwanenga uSiya.
Yethula isinqumo iMantshi uMnu Mhlonipheni Sibiya, uveze ukuthi ukube uSiya nommangalelwa babengaphuzile, sasingeke senzeke lesi sigameko. Ube esemlahla ngecala qede wamdedela ngebheyili ka-R1000.
Icala ulihlehlisele umhla ka-27 kwephezulu ukuze akhiphe isigwebo.
