INTATHELI YELANGA
INTUTHU eshunqe ngesikhathi iMelika igadla ngamabhomu kwi-Iran ngempelasonto, ixhophe irandi, ladunguzela, kwathinteka nentengo kawoyela ongahluziwe – okunyusa ingebhe yokuthi hleze lo mkhuhlane wandise kakhulu kunakuqala umthwalo kubathengi baseNingizimu Afrika, abavele bedonsa kanzima.
IMelika ingena ngenxeba elivulwe yi-Israel, ehlasele i-Iran ngoba ithi kayifuni ukulinda amathonsi abanzi, kwazise iyisola ngokuthi yakha izikhali zenuzi, yize izinhloli noHulumeni waseMelika bethe ophenyweni lwabo bathole ukuthi i-Iran ihlaselwa nje, ibengekho ezinhlelweni zokwakha lezi zikhali. UMengameli waseMelika, uMnu Donald Trump, ukusho kwagcwala umlomo ngeledlule ukuthi izinhloli zezwe lakhe ziqamba amanga aluhlaza, i-Iran iyazakha lezi zikhali.
Kuzokhumbuleka ukuthi ngesikhathi ihlasela okokuqala i-Israel – osekuneminyaka inobudlelwano obumuncu ne-Iran – kufe nabakhuzi bezempi abaphezulu base-Iran. Kubikwa ukuthi sekufe abantu abangaphezu kuka-800 selokhu i-Israel iqalile ukuhlasela.
Ngempelasonto, iMelika –Â okuyinto eyaziwayo ukuthi iyizintethe ezibelethene ne-Israel – igadle ezizindeni ezintathu zenuzi e-Iran, okuyiFordow, i-Isfahan neNatanz. Lokhu kuhlasela kulandelwe ngamazwi kaTrump, othe bazivithizile lezi zizinda, wasabisa ngokuthi bazoqhubeka nokugadla kuleliya lizwe, ukulikhinyabeza emshikashikeni walo wezikhali zenuzi.Â
Emuva kokuba abahwebi bepopole izigameko zangempelasonto njengoba ne-Iran isabise ngokuziphindisela ngokugadla ezinkanjini zeMelika eziseMiddle East, kuvele kwanyuka ingebhe kubatshalimali. Izimakethe zivulwe namhlanje ngoMsombuluko idola selithole amandla uma liqhathaniswa nemali yakwamanye amazwe. Beliwu-R18.05 – emalini yaseNingizimu Afrika – uma kuqhathaniswa no-R17.96 okuvalwe ngawo ngoLwesihlanu. Sekuwumlando-ke ukuthi i-Israel igasela e-Iran nje, imatasa nasePalestine – igadla iphindelela – kusukela iqembu lezihonga (lasePalestine) lahlasela kwelamaJuda mhla ka-7 ku-October 2023.Â
