ZILOKHU zande njalo izigameko zokubulawa kwabantu ngesibhamu eMaoti, eThekwini. Esigamekweni sakamuva, izolo ngoMgqibelo, kudutshulwe kwabulawa abesilisa abathathu, kwalimala owesifazane oyedwa endaweni ebizwa ngeNigeria (khona eMaoti).
Ngokusho kwabenkampani yonogada ezimele iReaction Unit South Africa (Rusa), babizwe endaweni enezindlu zemiqasho kusihlwa izolo, lapho befice khona izidumbu ezimbili endlini eyodwa nesisodwa kwenye indlu.
Kubikwa ukuthi abafi (ababili) bebezidlela amanzi amponjwana ngesikhathi kungena izigebengu, zibabamba inkunzi, maqede zabadubula amahlandla amaningi. Kuthiwa izelelesi zibe sezidlulela kwenye indlu, zafike zadubula isizulu sesithathu, isidumbu saso esitholwe ngaphansi kombhede.
Owesifazane obehleli nabafi ababili udubuleke emnweni, kanti kuthiwa kutholakale inqwaba yamagobolondo ezinhlamvu zesibhamu sohlobo lwe-9mm.
