UZIMISELE ngokuqhubeka nokukhula ngaphakathi kwiGagasi FM uSthabile Mazubane, omenyezelwe njengodle umhlanganiso emncintiswaneni walo msakazo wokuthungatha umethuli weVodcast yawo kwi-App, obizwa ngeGagasi FM Rising Star.
USthabile (33) wasePietermaritzburg, umenyezelwe yisikhulu salo msakazo u-Alex Mthiyane ngoLwesihlanu ntambama ohlelweni, iGagasi Fast Lane, olushayelwa nguSphectacular, uNaves noSelbyonce.
USthabile udle umhlanganiso ngemuva kokuvotelwa ngabalaleli balo msakazo, nethimba lamajaji, kanti uhlelo lokuvota kuthiwa belusingethwe ngumcwaningi ozimele. Izibongela ngokunqoba, le ntokazi ithe izizwa ithobekile ngokuba yilungu lomndeni weGagasi FM.
“Njengomuntu ongumlandeli walo msakazo, leli thuba lifike ngesikhathi lapho bengidinga khona into engizokholelwa kuyona, ezonginikeza ithe-mba,” kusho uSthabile.
Uqhube ngokuthi uzimisele ngoku-sebenza ngokuphindiwe ukuze akhule kulo msakazo.
“Ukuthola leli thuba kufakazele isisho esithi, ukubambezeleka kwamaphupho akusho ukuthi ngeke afezeke.”
Okhulumela lo msakazo, uKhulekani Shandu, uthe bayamemukela uSthabile.
“Siyazi ukuthi bekungelula njengoba abantu abebengenele lo mncintiswano, bebenethalente eliyisimanga. Kukhombisile ukuthi iKZN iqukethe ithalente eliningi. Siyabonga kubona bonke abavotile ukuze sikwazi ukuthola umanqoba,” kusho uShandu.
