UMSAKAZO iSakha Isizwe FM isingathe ngempumelelo umcimbi iSakha Isizwe Traditional Awards, obubanjelwe eStable Theatre ngoMgqibelo. Lo mcimbi ubuhlose ukukhuthaza, ukuvikela nokugubha namasiko ikakhulukazi entsheni.
Umisebenzi uqale eMazisi Kunene Museum, lapho izintombi zafika khona zizokhempa njengengxenye yokuzilungiselela umcimbi. Ngosuku olulandelayo, zabe sezibhekisa eStable Theatre, lapho zamukele khona imiklomelo ngokuziphatha kahle, ukuhlonipha amasiko nokuba yisibonelo esinhle emphakathini.
Phakathi kwezintombi ezihlomule ngemiklomelo bekukhona uMathembi Sithol (43), okuthe ngokuzinikela kwakhe ekugcineni amasiko wahlonishwa ngomklomelo.
Omunye ophume phambili kube ngu-Aphelele Ndlovu, ohlomule ngomklomelo wemali, waphinde waqokwa njenge-Ambassador yeSakha Isizwe FM, ngenxa yokuziphatha kwakhe okuhle nokuba yisibonelo emphakathini.
Lo mcimbi ubuhanjiswe abaculi nabalingisi abanohlonze. Phakathi kwabo bekukhona uNyuswa, owaziwa ngokulingisa umculi ongasekho uZahara namaNdenza Twins.
Ekhuluma neLANGA, umsunguli weSakha Isizwe FM, uDkt Thandeka Madlala-Khathi, uthe lo mcimbi ube yimpumelelo enkulu ngenxa yokwesekwa umphakathi, abaxhasi nabo bonke ababambe iqhaza.
“Inhloso yethu wukukhuthaza amasiko ethu, ukwakha isizwe esihlonipha ubuntu nokunika abantu abenza kahle emphakathini ukuhlonishwa okubafanele. Siyabonga kubo bonke abasixhasile nabebeyingxenye yalo mcimbi. Siyajabula futhi ukumemezela ukuthi sisalungiselela omunye umcimbi omkhulu ozoba sekupheleni kwalo nyaka,” kusho uDkt. Madlala-Khathi.
ISakha Isizwe FM ithe izoqhubeka nokusebenzisa imicimbi efana nale ukukhuthaza intsha nomphakathi wonke ukuba baziqhenye ngamagugu namasiko abo, kuyilapho kuhlonishwa labo abenza umehluko omuhle emphakathini. Umcimbi uphethe ngokunikezwa kwemiklomelo, ukuzijabulisa kanye nesethembiso sokuthi iSakha Isizwe Traditional Awards izoqhubeka ikhule ibe ngomunye wemicimbi ehamba phambili ekukhuthazeni amasiko eNingizimu Afrika.
