KUZOKWENZEKA okungajwayelekile ngosuku lokulondolozwa kwesidumbu sikaMnu James “God’ Olulal’ Amankankane” Mthembu (61) obeyinyanga edumile kuleli yasePhelandaba, eManguzi, KwaMhlabuyalingana.
Umufi udlule emhlabeni ngezithuba zakusihlwa ngoLwesihlanu emuva kokudutshulwa amahlandla amaningi ngabantu abangaziwa esemzini wakhe. Udutshulwe kulungiselelwa ukuqala kokudliwa kwenyama ebiyosiwa kuma-braai stands amabili, ngenhloso yokuzithokozisa nomndeni wakhe.
Ngokusho kukaMnu Khuphula Mthembu, ongumfowabo kamufi, umngcwabo kamfowabo uzosingathwa ngendlela engajwayelekile.
“Ukuphuma kwesidumbu endlini kuyiwa emathuneni, kuzobe kwenziwa ngohlelo lwempilo abeyiphila yokwelapha. Izangoma zizosina zidedelana. Maphakathi neviki, kuzoba nosuku lapho kuzoba nomgidi wezangoma okulindeleke ukuba ziqhamuke ezingxenyeni ezahlukene zaKwaZulu-Natal.
“Siyazikhalela ngokwenzekile kodwa nathi sikhalela wona umphakathi ngoba umfowethu wazinikela ekuwusizeni ngengxenye enkulu yenzuzo abeyithola ngomsebenzi namabhizinisi akhe. Akafundanga njengoba wagcina emabangeni aphansi, kodwa ubezithanda izinto ezinhle futhi eyikhuthaza nemfundo ezinganeni.
“Kubona bonke abake bathwasa lapha kumfowethu, akakaze athwasise izingane, kunalokho ubezijikisa, athi maziyoqhubeka nemfundo ezikoleni,” esho.
