KULINDELEKE ukuba silalelwe ngoLwesibili oluzayo eNkantolo yeMantshi yaseThekwini isicelo sebheyili kathishanhloko osolwa osolwa ngokubulala unkosikazi wakhe. UMnu Khayelihle Dhlomo ubevele namuhla kule nkantolo, lapho okuvele khona ukuthi umbuso nabammeli basematasa ngokulungiselela izethulo zebheyili.
UDhlomo, ongumshana kasopolitiki oyilungu lePhalamende lakuleli uMnu Sibongiseni Dhlomo, naye obekhona enkantolo, usolwa ngokubulala unkosikazi wakhe owayenguthisha, uNkk Khanyisile Dhlomo, okwatholakala isidumbu sakhe sinamaxeba okugwazwa emzini wabokhe oseMalvern, eThekwini.
Kubikwa ukuthi umsolwa waveza ukuthi umufi uzibulele. Uphenyo lwakamuva luveze ukuthi umsolwa unesandla ekufeni kukankosikazi wakhe, okuholele ekuboshweni kwakhe. Ekhuluma naleli phephandaba uDhlomo, uthi isenzo somshana wakhe sabethusa kodwa bewumndeni, futhi bajabule ngoba sekuseduze iqiniso livele.
“Sadideka ukuthi umuntu angazibulala kanjani ngokuzigwaza amanxeba. Siyabonga ukuthi icala selifike kulesi sigaba esiyindlela ebheke ekutheni kutholakale iqiniso nobulungiswa.
“Njengoba silapha nje, sibambisene nomndeni wakubo kandodakazi (umufi) kwaNduli ngoba sonke sifuna into eyodwa, okuwukutholakala kobulungiswa,” esho.
