KUGCINE kuhlehlile ukunikezelwa ngokusemthethweni kwebhilidi ‘ebelidliwe’ lika-hulumeni i-Westpoint Lodge, elisemaqweni Vicoria Embarkment, eThekwini, ebelizodluliselwa kuMasipala weTheku nguMnyango wezeMisebenzi yoMphakathi neNgqalasizinda eKZN namuhla.
Nakuba kuhlelile ukunikezelwa kwalo kodwa uMasipala weTheku ukuqinisekisile ukuthi bonke ababebehleli kulo ngokungemthetho okubalwa kubo nabangabokufika kuleli sebekhishiwe.
Lomasipala uthi ukuhlehla kokunikezelwa kwalo kudalwe ukungaphothulwa kwezinye zezinhlelo ezithile phakathi komnyango nalo mamsipala.
Kuzokhumbuleka ukuthi ngonyaka ophelile uMasipala weTheku noNgqongqoshe weMisebenzi yoMphakathi neNgqalasizinda kuzwelonke, uMnu Dean Macpherson wasayina isivumelwano sokuthi sokuthi amanye amabhilidi kahulumeni adliwe ngabokufika alungiswe kabusha abuyiselwe kuMasipala, kuthi lawo onakele kakhulu abhidlizwe.
Lo masipala ngokubambisana noNdunankulu waKwaZulu-Natal uMnu Thami Ntuli ophethe uMnyango wezokuPhepha koMphakathi, wahola umkhankaso wokugasela kulawa mabhilidi kungazelele muntu, kulawa afana ne-Westpoint Lodge bakhishwa bonke ababehleli kuwo kwabashwa nababenza ubugebengu.
