KUDUME inhlokomo, kwaqhuma imikikizo esigcawini kugiya umholi webandla lamaNazaretha, ohlangothi lwaseBuhleni, iNkosi uMduduzi ‘Nyazilwezulu’ Shembe, emcimbini wokwemuliswa kwendodakazi yakhe nondlunkulu uMaMsomi, uNkz Nontokozo Shembe, ngeSonto.
Lo mcimbi obusemzini woNyazi, oseMzinyathi, ubuhanjelwe yizicukuthwane okubalwa kuzona osomabhizinisi namakhosi ezizwe okubalwa kuwona iNkosi yamaQadi, uMqoqi Ngcobo, iNkosi yakwaSithole, uNgqayizivele Sithole nabefundisi bebandla.
Bekukhona nosaziwayo abangamalungu ebandla okubalwa kubo abaculi uSaliwa, uMjolisi noSjava.
Inhlokomo isuke ngemuva kokuba uNontokozo ehlabe umkhonto phambi kukayise, osukume nebandla lezinsizwa ebelimphahlile, wagiya ephindisa umkhonto. Ube esewuhlaba phambi kwendodakazi yakhe, wabe eseyichoma imali, kwabe sekulandwa ubhasikidi, lapho ibandla ebelihamba noNyazi lifake khona imali.
UNontokozo ube esegiya noyise ngesikhathi eseyohlala phansi emphemeni abebekelwe wona esigcawini. UNontokozo ube esethola ezinye izipho kwizihambeli zomcimbi.
Umthombo waleli phephandaba, oyilungu lebandla, uthi okwenziwe wuNyazi kuyisifundo kubona njengamalungu ebandla.
“Eminyakeni emithathu noma emine eyedlule, sike sakubona lokhu ngesikhathi inkosi yenzele amanye amadodakazi ayo umcimbi ofana nalona. Lokhu kuyisifundo sokubaluleka kokugcinwa kwemvelaphi yethu, nokubonga izingane zethu ngokuhlonipha nokuziphatha kahle,” esho.
