IZITHOMBE NGU: JOHN HLONGWA
KUVUNYELWENE ngokuhlonishwa kwabaculi abangasekho emhlabeni, abakhule neMpucuzeko Maskandi Festival, kusukela isungulwa eminyakeni edlule njengoba nonyaka ibihlanganisa iminyaka ewu-12.
Lokhu kuvezwe ngumsunguli wayo, uMnu Xolani Mcineka ngoMgqibelo ebusuku, ePeople’s Park, eMoses Mabhida Stadium, eThekwini, ngesikhathi kuhloni-shwa omunye wabaculi abangasekho, uMajotha Zungu.
UMcineka uthe bavumelene nohulumeni waKwaZulu-Natal, ngaphansi koMnyango wezobuCiko, amaSiko, nezemiDlalo, ukuthi lokhu bazokwenza ngokubambisana. Kuhlonishwe uMajotha ngo-R25 000, owemukelwe wumndeni wakhe phambi kwezinkumbi zabantu ebezibuthene kule nkundla.
“Baningi abaculi esiqale nabo iMpucuzeko, yabakhulisa – nayo yakhula nabo. Iningi labo abasekho emhlabeni, kodwa iqhaza labo kasisoze salikhohlwa. Yingakho kulo nyaka sithathe isinqumo sokuthi ngokubambisana nohulumeni, senze uhlelo loku-hlonishwa kwamaciko angasekho emhlabeni ebesiyibambe nawo kwiMpucuzeko,” kusho uMcineka.
Ubonge ukwesekwa kwalo mcimbi njengoba abathandi bomculo kamaskandi bephume ngothi lwabo.
Utshele ILANGA ukuthi lo mcimbi uyigugu emabhinceni, kanti nabaculi bakhipha unyawo uma bewulungiselela ngoba usezinhliziyweni zabaningi.
“Ngibonga kakhulu uhulumeni wesifundazwe ngokwelula isandla kulo mcimbi ngoba usho lukhulu emacikweni njengoba siwathuthukisa, siwakhulisa ngisho nasakhula endimeni, ngokuwanikeza ithuba lokuzikhangisa. Kukhulu kakhulu esikwenzelwe wuhulumeni wesifundazwe, uMasipala weTheku, yiphephandaba ILANGA nabakwaMTN,” esho.
UNkz Nonhlanhla Zungu olamana noMajotha, uthe kubajabulisile bewumndeni ukuthi iqhaza likaMajotha labonakala emculweni.
“Besingakaze sicabange ukuthi kungenzeka uhlelo olufana nalolu egameni likaMajotha. Sibonga kakhulu kwabeMpucuzeko, abakwenze emndenini kusho lukhulu,” kusho uNkz Zungu. Kulo mcimbi amaciko akhombise ukuzimisela kakhulu kusukela kwingqephu abeyigqokile, nangezinga lokujabulisa abantu esiteji.
Phakathi kwabaculi abebegqoke ingqephu eyehlukile, kubalwa iMfezemnyama, uKhuzani, uMroza ubegqoke iphinifa, nabanye. Abaculi abashiyelane inkundla kubalwa Izingane Zoma, uNtencane, uMnikezwa, uDumakahle, uMenzi, uCevuzile, Amageza Amahle, uBahubhe, uMdumazi, uMayoghurt, uThokozani Langa, u-Ali Mgube, uMfiliseni Magubane, uMgojei, uMsezane, uNjoko, uFalabo, uGatsheni, uMlabalaba, uMzukulu, uMkhulekelwa, uSkweletu, uJaiva Zimnike, uJumbo, uSaliwa, AmaNND, uQhosha nabanye.
Bekulindeleke ukuthi ngehora lekhethelo (Golden Hour) okuyisikhathi esihlukanisa usuku ngo-00:00, kunandise uMayoghurt, kodwa akwenzekanga – kunikezwe iqembu elisha elibizwa ngokuthi AmaLegend, okuyiqembu elibophele uShwi, uThokozani no-Ali Mgube.
