KUJUTSHWE uphenyo ngohlelo lwamanzi oludle ngaphezu kuka-R151 million, obekufanele kuhlomule kulo imizi engaphezu kuka-2 400 ngaphansi kukaMasipala wesiFunda uMkhanyakude, kodwa kwahlomula ewu-700. UNgqongqoshe wezokuBusa ngokuBambisana nezoMdabu, KwaZulu-Natal, uMfu Thulasizwe Buthelezi (osesithombeni), uveze lokhu ngesikhathi ehambele KwaNondabuya, eJozini, eMkhanyakude ngeSonto. Uthe ngokuthola kwakhe – emuva kokuhambela ku-ward 19, eMkhanyakude – uhlangane nezakhamizi ezingaphezulu kuka-1000, ezikhale ngokuthi kazikaze zihlomule kulolu hlelo.
“Izakhamizi ziveze izingqinamba ezibhekene nazo. Sizophenya ukuze sithole ukuthi kungani kunemiphathathi eminingi kangaka engahlomulanga kulolu hlelo obekumele uhlomule kulona. UMnu Thokozani Mkhwamumbi uze waveza nodaba lokuminza komfanyana oneminyaka ewu-9 endaweni yaKwaShukela,” kusho uMfu Buthelezi.
Ube esethembisa le miphakathi ukuthi kuzokwenziwa uphenyo olunzulu, kutholwe kabanzi ukuthi yenziwani imali okwakumele isebenze kulolu hlelo nokuthi kungani kuhlomula u-30% kuphela.
“Kakwamukelekile nje ukuthi uhlelo olufuze lolu lungawusizi umphakathi, ngakho-ke kumele kutholakale izimpendulo ngokushesha,” kusho yena. Unxuse ukuba kulekelelwe – ngamalungiselelo omngcwabo – umndeni womfana oshonile.
