KUKHUNJULWE inkakha yomlingisi uConnie Chiume kwethulwa ngokusemthethweni ifilimu eqoshelwe KwaZulu Natal iMeet The Khumalos ezokhonjiswa kuNetflix emcimbini obuseBallito ngoMgqibelo.
Le filimu agabe ngabalingisi asebezakhele igama yethulwe ngomcimbi wekhethelo obuhanjelwe yizicukuthwane zamazinga ahlukene.
Inkakha yomlingisi edlule emhlabeni ngonyaka owedlule sekuyophela unyaka uConnie ungomunye wabalingisi abazobonakala kuyona njengoba kuvela ukuthi ingeyokugcina ayiqophile ngaphambi kokuthi endele kobandayo.
Kulo mcimbi obekukhona izingane zayo le nkakha ikhunjulwe ngemisebenzi yayo njengoba ichazwe njengobewukhonzile lomkhakha futhi ezimisela ngaso sonke isikhathi.
UConnie uvezwe njengomlingisi obengaziphakamisi nakuba ebesemnkantshubomvu kulo mkhakha kanti nangesikhathi kuqoshwa le filimu ukhombise ukuzimisela ngokweqile nakuba eqophe impilo yakhe isiqala ukuba ethe ethe.
Indodana kaConnie i-Itmeleng Chiume ubonge uthando unina asaqhubeka nokulithola kulo mkhakha.
“Siyabonga ukuthi imisebenzi kamama isaqhubeka nokuqhakanjiswa njengobamndeni sizizwa siduduzeka ukuthi ukwenze kwaze kwaba sekugcine abekuthanda impilo yakhe yonke,” kusho u-Itumeleng.
Uthe nakuba kusekusha kusazwela njalo uma kuvela unina kumabonakude kodwa baduduzwa wukubona imisebenzi yakhe emihle.
U-Itumeleng uthe bazoqhubeka nabo njengomndeni ukuhamba ezimfundisweni zakhe futhi bamhloniphe noma engasekho unina.
Le filimu igabe ngabalingisi okubalwa kubo u-Ayanda Borotho, Khanyi Mbau, Siyabonga Shibe, Bonga Dlamini, Jesse Suntele, Khosi Ngema, Amanda Khubone nabanye. Le filimu kulindeleke ukuthi iqale ukukhonjiswa kwiNetflix ngomhla ka-11 kwephezulu.
