WELULEKWE ngokungalinge aziphakamise uNdlunkuku uThandiwe MaNdlovu Zulu emcimbini wokumhalalisela ngokuthola iziqu zobudokotela azethweswe yi-UKZN, eThekwini, ngocwaningo alwenze ngeqabunga iStevia, elitholakala eKenya.
UNdlunkuku ungowesine emakhosikazini eSilo esesakhothama, uMdlokombane. Leli khambi enze ngalo ucwaningo, kuhloswe ngalo ukwehlisa amandla ezifo eziphathelene noshukela.
Umcimbi ubusesigodlweni sakhe kwaLindizulu, KwaNongoma, ngoMgqibelo. Ubuhlukene izigaba ezimbili. Kuqale ngenkonzo yebandla lakhe, kwalandela umcimbi wezikhulumi.
Izikhulumi eziningi bezigcizelela ukuthi kumele akhuthalele ukubhala ukuze abafundi bezokuba nezinto abazozifunda. Undlunkuku ufunde wagogoda ezifundweni zebhizinisi, wabe esecu-bungula ngekhambi. UMntwana uMbonisi ucele iNyosi uMpangazitha ukuba ihashe uMdlokombane
Izihambeli zamukelwe nguMntwana waseKhwezi, uMbonisi, othe ukuba usaphila uMdlokombane ubezobuza ukuthi: “Ndlunkulu! Njengoba usufake ijazi nje, ucabanga ukuthi sewedlula mina?” Kuvele ukuthi uNdlunkulu lezi ziqu uzithole ngoba ubehlale egqugquzelwa nguMdlokombane emfundweni.
UMntwana uMbonisi ucele iNyosi uMpangazitha ukuba ihashe uMdlokombane. Okhulumele umndeni wakwaNdlovu, lapho okuzalwa khona undlunkulu, uNkk Nondumiso Mbense, uthe: “Siyabonga ngokusiphakamisa emndenini, uyisibonelo esihle. Uma sikhuluma ngomuntu othanda umndeni wakhe, sisuke sikhuluma ngawe Ndlunkulu.
“Siyabonga kwaZulu. Ukuba uMdlokombane ukhona, ngabe kusindwe ngobethole namhlanje. Ngibonga izinyane uMukelisiwe ngendlela eliphethe ngayo abazali balo. Ndlunkulu, wenze imfu-ndo yaba sesitayeleni.”
INkosi Phathisizwe Chiliza okhulumele amakhosi, uthe nakuba kuqopheke umlando kodwa imicabango yakhe ithi ukuba uMdlokombane ukhona, ngabe uthini.
“Egameni lamakhosi sifisa lokhu kube yisifundo ukuthi imfundo kayikhulelwa. Siyakubonga Ndlunkulu nendlela owazana ngayo noNkulunkulu. Ngisho ubhekene nobunzima, kawusuki kuye. IziNyane uMukelisiwe belikhonzwe kakhulu yiNgonyama uMdlokombane, siyalibonga ngokweseka umama walo. Lokhu kuzokwenza kwenyuke ukuhlonishwa kwesigodlo. Nalapho ekhona uMdlokombane uyajabula.”
Okhulumela iNdlunkulu kaZulu, iNdlovukazi uMayvis uKaGwabini, uthe undlunkulu uyisibonelo esihle, ukukhombisa ukuthi kaku-hlalwa emhlabeni, kuyasetshenzwa. Isikhulumi esiqavile, udokotela uThulani Makhanya, sincome undlunkulu ngokungadikibali ukufunda, yize kwakhothama uMdlokombane ephakathi nezifundo zakhe.
“Iziqu zemfundo kazikubuzi ukuthi uzalwa ngubani noma ungowakuphi, kodwa zifuna ubekezele, futhi uphokophele,” esho.
Ezibongela uNdlunkulu, uthe: “Ngiyabonga kini nonke ikakhulukazi iNdlunkulu, usuku lwami lungolwenu. Umsebenzi wokucwaninga unzima kakhulu. Ngiyabonga ko-supervisor bami.”
Phakathi kwabebehambele umcimbi bekukhona uMnu Blessed Gwala we-IFP neMeya yeTheku uMnu Cyril Xaba. Uhlelo beluphethwe ngesinono nguMntwana uThulani nombhali wemidlalo kamabonakude, uDuma kaNdlovu. Nokho akekho undlunkulu kaMdlokombane obekhona.
