Ilanga News
Home 9 Ezemali 9 Ezamabhizinisi/Ezomnotho 9 Kukhuthazwa ukudla okunomsoco ngosuku lwemakethe eThekwini

Kukhuthazwa ukudla okunomsoco ngosuku lwemakethe eThekwini

by | 16 November 2025

LUHLOSE ukuhlomulisa abalimi abasakhula nokukhuthaza abantu ukuthi badle ukudla okunomsoco usuku lwemakethe olubizwa ngeSoil To Soul Farmers Market Day oluzoba ngomhla ka-30 kwephezulu ePort Natal Maritime Museum Parking eThekwini.

Lolu suku kuzobe kubuthene abalimi abaqhamuka ezindaweni ezahlukene KwaZulu Natal bezothengisa ngemikhiqizo yabo abazitshalele yona.

Kulindeleke abalimi abangaphezulu kuka-20 abazobe bethengisa ngezitshalo ezinomsoco kusukela kwimifino, amadumbe, ubhatata, amaklabishi, izanqanti nezithelo ezahlukene ezitshalwe ngaphandle kokusebenzisa izithako.

UNkz Thandi Dlamini ongumnikazi weThandi’s Fresh Produce eseClairwood futhi ongumhleli walolu suku lwemakethe uthe abantu abazohambela le makethe ngomhla ka-30 kuLwezi bazothola ithuba lokuthenga imikhiqizo ekhiqizwe ngaphandle kwezithako kodwa okusetshenziswe imvelo ukuyikhiqiza.

“Siphila esikhathini lapho kumele sibuyele emasisweni ngendlela yokudla esikudlayo. Isikhathi esiphila kusona abantu bahaqeka kalula izifo ezahlukene ngenxa yokudla okunezithako ezisetshenziswayo ezitshalweni zethu. Ngakhi ukuba kule makethe bazothola ukudla okukhiqizwe ngemvelo okunomsoco nempilo,” kusho uNkz Dlamini.

Uthe abantu bazophiphe bathole nezitshalo zemvelo zokwelapha ezingakwazi ukubasiza bagweme izifo ezithile futhi balapheke uma sebehaqekile.

UNkz Dlamini uthe inhloso yalolu suku wukukhuthaza abantu ukuba bazijwayeze ukudla izitshalo zemvelo ezinempilo nomsoco.

“Ukudla ngendlela efanele kungaba nomthelela ukuphila isikhathi eside futhi ukwazi ukungangenwa yizifo kalua,” esho.

Uphinde waveza ukuthi okunye okumqoka wukunikeza abalimi abasakhula ithuba lokuthi bakwazi ukuhlangana namakhasimende bahlomule futhi bathuthuke.

“Lona akubanga wunyaka olula kubalimi njengoba behlangabezane nezingqinamba ezahlukne ikakhulukazi ezithinta isimo sezulu esingabavunanga neze.

Abalimi abasakhula ibona abashayeke kakhulu njengoba bengakwazanga ukuhlomula ngendlela efanele,” kusho uNkz Dlamini.

Uthe okuhle ngokuba kule makethe kuzobe kukhona nabezitolo ezinkulu abazokwazi ukuthi bakhe ubudlelwano nabo ukuze bathuthuke kwezamabhizinisi.

Unxuse abantu ukuba baphume ngobuningi njengoba kuzobe kungenwa mahhala kanti okunye wukuthi bangakwazi ukuza nemindeni yabo okuhlanganisa nezingane njengoba izobe ikhona indawo ezibekelwe yona ukuzithokozisa ephephile.

“Nezitolo ezizobe zidayisa ukudla okunempilo zizobe zikhona ngaphakathi kanjalo neziphuzo ezinomsoco,” ephetha.

Ezisematheni

Kulindwe ibhodi likashwele ngokudedelwa kukaNsibande

Kulindwe ibhodi likashwele ngokudedelwa kukaNsibande

UMMELI kaWandile Nsibande (36), oboshwe kunombhikisho oholele ekushisweni kwezakhiwo nezimoto eThekwini, ngenyanga edlule, uthe usebhalele ibhodi lokubuyekezwa kwezicelo zokudedela iziboshwa ngoshwele, ngenhloso yokuthi akhululwe ejele. UNsibande (osesithombeni),...

Kuyaqalwa ukufungiswa kwamakhansela omasipala

Kuyaqalwa ukufungiswa kwamakhansela omasipala

UMASIPALA waseMngeni uzoba ngowokuqala komasipala baKwaZulu-Natal, ukufungisa amakhansela nobuholi obusha ngemuva kokhetho. Lokhu kuvezwe yisimemezelo esikhishwe yimenenja yalo masipala, uMnu Mzingisi Hloba, ukuthi ngoLwesihlanu lo mkhandlu uzofungisa amakhansela...

Udilikajele kowadlwengula ingane yakhe ethi iyajola

Udilikajele kowadlwengula ingane yakhe ethi iyajola

UGIXATSHEZWE ngodilikajele yiNkantolo yesiFunda kwaNongoma owesilisa (46), owadlwengula ephindelela indodakazi yakhe, edinwa wukuthi isiqomile. Le ndoda yakwaNongoma esingeke siyidalule igama layo ukuvikela isisulu, yagila lo mhlola ngoNtulikazi (July) nyakenye,...