IKHUZE isihlava samadoda akhulelisa izingane ezineminyaka esuka ku-10 kuya ku-19 iMeya kaMasipala wesiFunda uMkhanyakude, uMnu Siphile Mdaka. UMdaka ukhuze lokhu ngesikhathi kuqhubeka imbizo yamadoda ebeyibanjwe ehholo komphakathi iLulwane, kwaSkhemelele, kwaMhlabuyalingana, ngoLwesihlanu. Uthi ucwaningo luveza ukuthi indawo yakwaMhlabuyalingana ingenye yezindawo ezihamba phambili ngokukhulelwa kwezingane.
“Ucwaningo lwakamuva luveza ukuthi lapha kwaMhlabuyalingana abalelwa ku-288 amantombazane aneminyaka ewu-19 kuyaphansi. Awu 59 kulesi sibalo aphakathi kweminyaka ewu-10 kuya ku-13. Siyanxusa ukuthi amadoda endawo ahlangane axoxe ngalezi zinkinga bese avulele amacala abesilisa abakhulelisa izingane,” esho.
Kuyo lembizo amadoda nezihambeli eziphuma ezinhlakeni ezehlukene acobelelane ngolwazi lokuziphatha nokuvikela umphakathi wonkana. Ukuza kwale mbizo kule ndawo kulandela isigameko sangasekuqaleni konyaka lapho okwahlaselwa khona, kwagencwa kwabulawa izingane zakwaKhumalo ezintathu ezaziphakathi kweminyaka ewu 5 no15.
