Igatsha likaKhongolose ngaphansi kwesiFunda iMzala Nxumalo eVryheid lisola uMkhuzi wamaPhoyisa eKZN uLT General Nhlanhla Mkhwanazi ngokuxhomondela ezinsolweni ezibhekiswe kuNgqongqoshe wamaPhoyisa uMnuz Senzo Mchunu.
Leli gatsha liphumele obala ngokweseka uMchunu osanikwe ikhefu eliyisipesheli ngemuva kokuba uMengameli Cyril Ramaphosa ememezele ikhomishana yokuphenya izinsolo zenkohlakalo emaphoyiseni nezidalulwe uMkhwanazi.
UMnuz Lindokuhle Xulu ongumgcinimafa wegatsha iward 23 eHlobane uthe uMchunu ukhombise ubuqotho ngokuzicelela ikhefu ukuze uMengameli Cyril Ramaphosa akwazi ukuqala uphenyo oluzoholwa iJaji uMbuyiseli Madlanga.
“UMchunu ukhombisile ubuqotho ngakwenzile njengoba ekwamukele nokusungulwa kwekhomishana . Nokho siyawagxeka amahlebezi okuthi kunabaholi be-ANC abahlangana isikhekhelembana nomholi weMKP uMnuz Jacob Zuma ukuze kudicilelwe phansi ikhomishana kamengameli. Kuyishwa nje ukuthi kubenabaholi embuthweni abazihlanganisa neMK Party,” kusho uXulu.
Ukusho lokhu nje kuthiwa kunabaholi abafuna iMK Party ixove ikhomishini ngezinkantolo kuphinde kuxoshwe uMchunu.
UXulu uthe usola ukuthi kunetulo elphehlwayo lokuvala uMchunu ekutheni angenele isikhundla sobuMengameli kuKhongolose ngonyaka ka-2027.
UXulu uthe bayamgxeka noMkhwanazi ngendlela adalule ngayo izinsolo ezidicilela phansi igama likaMchunu.
