AYAQHUBEKA amalungiselelo enkonzo yomngcwabo yobeyinxusa laseNingizimu Afrika, eFrance, uMnu Nathi Mthethwa njengoba ngokohlelo isidumbu sakhe namanye amalungu omndeni wakhe besuke namhlanje ngoLwesine eFrance belibangisa kuleli.
Isidumbu sikaMthethwa kulindeleke ukuba sifinyelele eNingizimu Afrika kusasa ngoLwesihlanu njengoba kumenyezelwe ukuthi inkonzo yomngcwabo osezingeni likahulumeni wesigaba sesibili, izokuba ngeSonto eDondotha, kwesaKwaMthethwa, eMpangeni.
Izolo ngoLwesithathu ihhovisi likaMengameli Cyril Ramaphosa limemezele ukuthi uMthethwa uzongcwatshwa ngokwesigaba sesibili somngcwabo kahulumeni kazwelonke. Kusukela kusabalale izindaba zokudlula kukaMthethwa, izikhulu zikahulumeni nabanye osopolitiki bebelokhu bengenile emagcekeni akwaMthethwa, ukuyodlulisa amazwi enduduzo.
UNdunankulu waKwaZulu-Natal uMnu Thami Ntuli ungomunye oseke wavela kwaMthethwa njengoba etheleke izolo ehola ithimba longqongqoshe besifundazwe. UNtuli udlulise amazwi enduduzo emndenini egameni likahulumeni wesifundazwe. Uchaze umufi njengomholi osebenzele umphakathi njengoba ephathe izikhundla ezahlukene kuhulumeni.
“Siwuhulumeni wesifundazwe asikhaleli umphakathi waseMfolozi, kodwa isizwe sonke njengoba esebenze kakhulu ngokusezingeni likahulumeni likazwelonke,” kusho uNtuli obonge uRamaphosa ngokugunyaza ukuthi uMthethwa angcwatshwe ngokusezingeni likahulumeni.
UNtuli uveze ukuthi beyiKhabhinethi yesifundazwe baqoke ukuthi banqamule umhlangano wabo ngenhloso yokuyodlulisa amazwi enduduzo emndenini wakwaMthethwa. Uncome amagalelo kaMthethwa kuzona zonke izigaba asebenze kuzona kuhulumeni nakwezinye izinhlaka ezithinta umphakathi.
Ishaqise abaningi indlela uMthethwa adlule ngayo emhlabeni njengoba imibiko yophenyo olungakaphothulwa iveza ukuthi uziphonse esitezi sesi-22, ebhilidini lehhotela iHyatt, eParis, khona eFrance, ngeledlule. Ngokwemibiko evelile, uMthethwa waphuma eya komunye umcimbi ngoMsombuluko odlule.
Kunemibiko ethi wathumelela umkakhe umyalezo “ezwakalisa ukuxolisa ngokuzibulala”.
