BAGWETSHWE ngokuqheliswa esikoleni abafundi bakamatikuletsheni basePrince Nomatiyela Secondary, abasolwa ngokudla izidakamizwa.
Abafundi abawu-11 kulesi sikole esisendaweni yaseKuvukeni, KwaNongoma, kuthiwa batholakale bedle amakhekhe anensangu (space muffins), bahluleka nawukufika esikoleni, okuholele ekutheni isigungu sesikole sinqume ukuthi bamiswe esikoleni.
ILANGA lithole ngemithombo yalo esondelene nalolu daba ukuthi kukhuzwa imihlola ngalesi senzo, esifaniswe nokudicilela phansi isithunzi sesikole. Umthombo uthe isenzo salaba bafundi sishiye abantu abaningi bemangele, kwazise lesi sikole sidume ngokuphasa ngamalengiso kwabafundi baso ku-matric.
Kuthiwa laba bafundi abebelungiselela ukubhala izivivinyo zaphakathi nonyaka, bagile lo mhlola ngaphandle kwamagceke esikole. Kuthiwa abawu-10 bebehlulwa nawukuhamba beye esikoleni ukuyobuyekeza izifundo (revision), ngoba bexakwe yizidakamizwa, kanti oyedwa ugcine efikile, kodwa isimo sempilo yakhe singesihle njengoba ebephalaza into engapheli.
“Ngesikhathi kusabhekwe lo obephalaza, kutheleke abanye babazali bezobuza ngaso lesi sehlo esikoleni. Yilapho-ke lo mfundi obephalaza ekhiphe khona iqiniso, wakhipha nabanye abebenabo kugilwa lo mhlola.
“Okusiphatha kabi wukuthi kuvele nokuthi laba bafundi kabaqali ukwenza lokhu, njengoba bakwenza kolunye uhambo lwesikole ababenalo. Lesi senzo sabo sibulala igama elihle lalesi sikole,” kusho umthombo.
Okhulumela uMnyango wezeMfundo KwaZulu-Natal, uMnu Muzi Mahlambi, uthe umnyango uyaseseka isenzo sesikole sokumisa laba bafundi, ngoba kawuhambisani nezidakamizwa ezikoleni.
hudla@ilanganews.co.za www.ilanganews.co.za
