UMKHUZI wamaphoyisa KwaZulu-Natal, uLt-Gen Nhlanhla Mkhwanazi uyalele uMkhuzi wamaPhoyisa kwisiFunda saseKing Cetshwayo, uMajor-General Sipho Ngubane, ukuba amise ngokushesha iphoyisa lesiteshi samaphoyisa iNtambanana emsebenzini, kuze kuphothulwe uphenyo ngokuzibandakanya kwalo neqembu elithile lezepolitiki.
Ngokombiko ovelayo, leli phoyisa elisesigabeni sikaConstable, kuthiwa liyisishoshovu seqembu lepolitiki elithile, elingeke lidalulwe, kanti kuthiwa selibonakale kakhulu lifake umfaniswano waleli qembu, lizibandakanya nasezinhlelweni zalo, okuyinto ethathwa njengephambene nemigomo yamaphoyisa.
Okhulumela amaphoyisa KwaZulu-Natal, uCol Robert Netshiunda, uthi isigaba-46 somthetho weSouth African Police Service ka-1995, kasivumelani nokwenziwe yileli phoyisa.
“Lo mthetho uvimbela amaphoyisa ukuba aphumele emphakathini, akhombi-se ukuthi ahambisana naliphi iqembu lezepolitiki. “Lokhu kuvimba amaphoyisa ukuba angabonakali nemifaniswano yeqembu; ukuba nesikhundla eqenjini; nokunye okukhombisa ngokusobala ukuthi eseka liphi iqembu.
“Iphoyisa okukhulunywa ngalo kulolu daba, selibonakale kaningi lizibandakanya neqembu. Lesi senzo salo singadicilela phansi isithunzi seqembu nesombutho uqobo,” esho.
Eqhuba, uthe phezu kokuzibandakanya kwaleli phoyisa naleli qembu, kunemibiko eveza ukuthi liphinde libe nenkampani ezimele yonogada, egada abantu ‘abaqavile’, iphinde yenze eminye imisebenzi eyenziwa ngonogada.
“UMkhwanazi uzophinde axhumane nethimba elibhekelele ukusebenza kwezinkampani zonogada iPsira, ukuze liphenye le mibiko. Lokhu kwenzeka ngenxa yokuthi umthetho kawuvumi ukuba amaphoyisa azibandakanye namabhizinisi afana nezinkampani zonogada, amatekisi noma endawo yokucima ukoma.
“Siyacela namalungu omphakathi ukuba aphumele obala, abike uma kunamaphoyisa azibandakanya nepolitiki noma nalawa mabhizinisi,” kuphetha uNetshiunda.
