UMNYANGO weMfundo KwaZulu-Natal ugqugquzele ukubambisana nokusebenzisana phakathi kothishanhloko bezikole ezenze kahle kwimiphumela kamatikuletshini kanye nalezo ezingenzanga kahle. Lokhu kushiwo yinhloko yalo mnyango uMnu Nkosinathi Ngcobo ngoLwesine, emcimbini obowubanjelwe e-Amanzimtoti Civic Centre, wokubonga nokuklomelisa izisebenzi zomnyango wemfundo kanjalo nabafundi abenze kahle kwimiphumela kamatikuletsheni yonyaka ka-2024 besiFunda saseMlazi.
Kuwo lo mcimbi umnyango uhloniphe othisha, abahloli kanye nothishanhloko abawu-25 izikole zabo ezizuze o-100%. Ekhuluma kulo mcimbi, uNgcobo uthi isiFunda saseMlazi yiso esibe nesandla ekuthuthukeni kwemfundo yesifundazwe esilale isibili kwimiphumela kamatikuletsheni kazwelonke.
“Ngiyacabanga ukuthi sonke siyazi ukuthi isifundazwe sethu senze kahle kakhulu kwimiphumela ka-2024, ukwenza kahle kwazo kuyinto eqalwe ukwenza kahle kwazifunda zethu. IsiFunda saseMlazi singesinye sezibe negalelo elikhulu ekutheni senze kahke njengesifundazwe. Lesi sifunda kasigcinanga ngalokho, siphinde sahamba phambili ngokukhiqiza imfundo esezingeni. Lokhu ngikusho ngoba ko-bachelor abawu-84 000 besifundazwe, abaningi bakhiqizwe yisiFunda saseMlazi. Yikho siqoke ukuzobonga ukusebenza ngokuzikhandla kwazo zonke izisebenzi zomnyango kulesi sifunda kanye nabafundi,” kusho uNgcobo.
UNgcobo uthi lolu hlobo lo mcimbi lubalulekile ngooba yilo olwenza bonke othishanhloko bezikole bafise ukuba yingxenye yalo. Uthi umnyango usazoqhubeka ‘nokushumayela’ elokubambisana phakathi kothishanhloko bezikole. Ubonge nobuholi bomqondisi walesi sifunda uNkk Busisiwe Mahlambi.
“Kubalulekile ukuthi zonke izisebenzi zoMnyango weMfundo zisebenze njengethimba. Ngalokho ngichaza ukuthi singabaholi bomnyango silindele ukuthi othishanhloko bezikole ezenze kahle baqhubeke nokusebenza ngokuzikhandla, baphinde balekelele ngamaqhinga abawasebenzisile labo abangenzanga kahle, nabo laba abangenzanga kahle silindele ukuthi bazisondeze kulaba abenze kahle banccele ulwazi. Ukucacisa nje ngokungenzi kahle, sisuke sisho labo abahlulekile ukuphasa ngephesenti esisuke sizibekele lona njengomnyango. Isibonelo uma sibeke ukuthi kulo nyaka sizothola u-85%, isikole esithole u-83% sithathwa njengesingenzanga kahle nokuyinto esiyibona isisebenzela kahle njenge-KZN ngoba bonke othisha nabafundi bayazikhandla ekufinyeleleli kulokhu esisuke sikubekile,” kusho uNgcobo.
