UMBUTHO wezokuvikela kuleli iSouth African National Defence Force (SANDF) usukhiphe isitatimende lapho khona wexwayisa amalungu ayo ngokuziphatha budlabha uma egqoke imifaniswano yawo.
Kulesi sitatimende esikhishwe ekomkhulu lamasosha ePitoli, kubhalwe ukuthi kuyaziwa ukuthi amalungu alo mbutho anamalungelo okwenza noma ngabe yini ngempilo yawo yangasese, okuhlanganisa nakho ukushutha izithombe nezithombe-mnyakazo (videos) kufakwe ezinkundleni zokuxhumana, kodwa kufanele akwenze lokho engakukhohlwa ukuthi angamasosha.
Ukukhishwa kwalesi sitatimende kulandela ukusabalala kwe-video yowesifazane okukholakala ukuthi uyilungu lalo mbutho, edansa maqede akhumule izimpahla zalo mbutho, kugcine sekuvela nezingubo zangaphansi, agcine ehlubule.
Le video isuse ukukhuluma ikakhulukazi ezinkundleni zokuxhumana abantu abaningi bazwakalisa ukukhathazeka ngokuziphatha kwamalungu alo mbutho.
Kwabanye kubuya amazwi kaMnu Bheki Cele owayengungqongqoshe wamaphoyisa kuleli, amazwi akhe agcina esephenduke ihlaya. UCele wayekhuza amaphoyisa ikakhulukazi esifazane ewabuza ukuthi afunani ezinkundleni zokuxhumana ikakhulukazi iTik Tok elokhu evela edansa, kunokuba enze imisebenzi yokubopha izigilamkhuba.
