UMENGAMELI waseNingizimu Afrika uMnu Cyril Ramaphosa, usenguSihlalo weSouthern African Development Community (SADC). Uqokelwe kulesi sikhundla ngoMsombuluko, ethatha izintambo kuMengameli waseZimbabwe, uMnu Emmerson Mnangagwa embuthanweni weSADC obuseNkosi Albert Luthuli International Convention Centre, eThekwini, ngempelasonto.
Lo mbuthano weSADC bekungoka-46, kanti bekudingidwa ngezinto ezithinta ingqalasizinda, ezolimo, ezokumbiwa phansi, nohwebo emazweni aseNingizimu ye-Afrika asathuthuka. Enkulumeni yakhe yokwamukela lesi sikhundla, uRamaphosa ukhale ngokuhamba kancane kwezinhlelo zokuhwebelana, emazweni angaphansi kweSADC.
Kulindeleke ukuba kusungulwe isikhwama esaziwa ngeSADC Fund, esizosiza amazwe athwele kanzima kwezomnotho. Kwakheke isithombe esingesihle ngoMsombuluko, ngesikhathi lo mbuthano uqhubeka, amalungu eMarch and March, ebhikisha ngaphandle kwendawo obubanjelwe kuyona. Amaphoyisa abesiqaphile isimo.
