IHHOVISI leSekela Mengameli, uMnu Paul Mashatile liyayichitha imibiko yokuthi uMashatile uxhaphaze izizumbulu zemali kahulumeni evakashele phesheya kwezilwandle.
Leli hhovisi lithi ukuvakashela kukaMashatile emazweni aphesheya kwezilwandle kusuke kungekhona ukuthi uyotetemuka, kodwa usuke ehambe ngokomsebenzi kahulumeni, ejutshwe nguMengameli wezwe uMnu Cyril Ramaphosa.
Esitatimendeni sabezindaba esikhishwe nguMnu Keith Khoza okhulumela uMashatile, kubalulwe ukuthi inhloso yalokhu kuvakasha kusuke kuhloswe ngakho ukuqinisa ubudlelwano beNingizimu Afrika namanye, lobo budlelwano obuthinta ezomnotho, ipolitiki, nezohwebo njalo njalo – akukhona ukuthi usuke eyotetemuka.
Ohambweni lwakamuva uMashatile ubevakashele eFrance ngenyanga edlule, kanti ngoNdasa (March) wayekade evakashele eJapan.
Kulolu hambo lwaseJapan lulodwa, kubikwa ukuthi kusetshenziswe isamba esingaphezu kuka-R900 000, kukhokhelwa izindleko zendawo yokulala kuphela eyayiqashelwe uMashatile nenkosikazi yakhe. Lokhu kuvele empendulweni yombuzo obubuzwe yi-Action SA.
Kubikwa ukuthi kusukela ngonyaka odlule engene esikhundleni uMashatile, izindleko zokuvakashela kwakhe emazweni aphesheya kwezilwandle zibalelwa cishe ku-R8 million.
Phakathi kwezindawo aseke wavakasha kuzo kubalwa i-Ireland, United Kingdom, Botswana, Zimbabwe, Japan, neFrance.
