ISITHOMBE NGU: PHUMLANI GAMA.
PHUMLANI GAMA
KWENGEZWE ezinye izikhulu zikaMasipala waKwaNongoma kubasolwa emacaleni athinta inkohlakalo yemali elinganiselwa ku-R800 000.
UMnu Mthandeni Zungu, owayeyimenenja yalo mkhandlu, zimkhalele njengoba engumsolwa wesikhombisa kubasolwa abayanyaniswa namacala awu-57 athinta ukudliwa bhusende kwemali yabakhokhintela.
NgoLwesihlanu olwedlule kuboshwe iMeya yalo masipala uMnu Mshangane Ndabandaba, isekela lakhe uMnu Sabelo Nkosi noNkk Babongile Sithole, ongusomlomo.
UZungu uboshwe noMnu Njabulo Dludla, owayeyimenenja ehhovisi lezokuphathwa kwemali kulo masipala, uMnu Khulekani Manqele owayeyimenenja ehhovisi lezokunikezelwa kwezimvume zokuthengwa kwempahla kamasipala nokukhishwa kwemisebenzi, noMnu Vukani Gumede oyilungu lomphakathi.
Kumanje kusenokunqakisana ngamazwi phakathi kombuso nabameli babasolwa, kubangwa udaba lokuba kuqalwe ukulalelwa kwezicelo zokudedelwa ngebheyili kwabasolwa ababoshwe ngoLwesihlanu. Umbuso uthi kayikho imantshi elungele ukulalela izethulo zabameli babasolwa.
