SEKUQASHWE inkampani ezohambisela iziguli amanzi emawadini esibhedlela sikahulumeni iPrince Mshiyeni Memorial eMlazi, kulandela ukuphela kwawo isikhathi esicela emasontweni amabili.
Lokhu kuvezwe umphathi welesi sibhedlela uMnu Gabriel Khawula ngesikhathi uNgqongqoshe woMnyango wezeMpilo KwaZulu-Natal uNkk Nomagugu Simelani-Mngadi enesigcawu nabezindaba kuso lesi sibhedlela ngoLwesibili ntambama. UKhawula ubephendula inkulumo yenyunyana yezisebenzi i-Public Servants Association (PSA) eveze ngoMsombuluko ngesikhathi imashela le nkinga kulesi sibhedlela.
Ikhale ngokuthi kuphoqwa izisebenzi zesibhedlela ukuba zikhe amanzi ziwahambise emawadini.
UKhawula uthe konke lokho kungamapunge.
Uthi lokho kungenxa yokuthi iPSA ayizange ilubhade emhlanganweni wezinyunyana nezibhedlela owawungoLwesine olwedlule.
“Ngiyakuqala lokho abebekusho, ngikholwa wukuthi bakusho ngoba bengayihambi imihlangano ebalulekile ephakathi kwethu nezinyunyana. Asikho isisebenzi esiphoqiwe ukuthi sikhe amanzi ngoba ikhona inkampani eqashelwe ukuthi ihambise amanzi emawadini. Le nkampani ile ebhekelele ukunakekelwa kwinkundla zalapha esibhedlela,” esho.
UNkk Simelane-Mngadi uthi banethemba lokuthi inkinga yamanzi kulesi sibhedlela uzoyixazulula maduze uMasipala weTheku.
Uthi okwamanje amanzi azoqhubeka nokulethwa ngamaloli kulesi sibhedlela, kanti nomasipala uzosihlinzeka ngamanye ayishumi phezu kwalawa akhona.
