SEZIQALILE ukutheleka izihambeli eMkhosini wesivivane obanjelwe esigodlweni seSilo samaZulu uMisuzulu kaZwelithini eMashobeni, maphakathi kwaKwaNongoma nasoPhongolo.Â
Kungokokuqala lo mkhosi ubanjelwa kulesi sigodlo esisanda kwakhiwa. Ingubo yeSilo (amabutho) isiqalile ukufika ivela ezindaweni ezahlukene. Ingxenye yamakhosi ezizwe zaKwaZulu-Natal isiqalile ukubonakala. Kukhona nezihambeli ezivela kwamanye amazwe ikakhulukazi iSwaziland.
Sekujwayelekile ukuthi kuyona yonke imicimbi eyenzeka kulesi sigodlo izwe lakaNgwane likhiphe izithunywa ezizokweseka egameni likaninalume weMbube yamaZulu, iNgonyama Makhosetive ‘Mswati III’ Dlamini.Â
Abesifazane bemikhakha eyahlukene, okungabanikazi balo mkhosi, baqale ukuwubamba ngoLwesine. Ngezithuba zasemini yantambama iSilo sizokwethula inkulumo yosuku.
Ngalo mkhosi abesifazane basuke bezohlangana, babhunge ngamaqhinga abangawasebenzisa ukuze kuzoba lula ukuthi babhekane nezingqinamba abahlangabezana nazo ezikhathini zanamuhla emakhaya nasemiphakathini abaphuma kuyona.Â
Ngakolunye uhlangothi kubuye kubizwe nabesifazane asebephukile (asebezingane) bezokhuthazwa ngokubaluleka kokuvuka bazithathe njengoba kunengxenye yabo okuvela ukuthi iyaye ilahle ithemba emuva kokuwa endleleni yoMkhosi woMhlanga.
