KUQHUME umkikizo kwasho ingoma eNkantolo eNkulu yaseMtubatuba kugwetshwa owesifazane oyiphoyisa owabulala umyeni wakhe naye owayeyiphoyisa – ebambisene neshende elisagcwele izinkalo.
UNombizodwa Ntinga ugwetshwe odilikajele ababili ngecala lokubulala umyeni wakhe uWarrant Officer Nkosinathi Ntinga noMnu Mpendulo Mdluli. Uphinde wagwetshwa iminyaka ewu-15 kwelokuthumba, wagwetshwa ewu-5 kwelokubamba inkunzi.
Uzakwabo aboshwe naye oyinkabi, uMpanza, owayekhona kubulawa laba, ugwetshwe imimyaka ewu-25 ecaleni lokubulala ngalinye newu-14 kwawokuthumba icala ngalinye, newu-4 kwelokubamba inkunzi. UW/O Ntinga noMdluli babulawa ngomhla ka-1 ku-Agasti ngo-2023 ngesikhathi kugasela ababulali emzini wakhe.
Ishende likaNtombizodwa lalihamba noMpanza ligasela kwaNtinga, basebethumba abafi. UMdluli watholakala elimele kanzima emuva kwamahora ambalwa washonela esibhedlela kanti isidumbu sikaW/O Ntinga satholwa sinenqwaba yamanxeba okudutshulwa.
