KUQINISEKISWE nokudlula emhlabeni kwegidangoma engozini yemoto ebulale umculi kamaskandi ebusuku uScebi Dlamini obedume ngeNkosi Yamagcokama.
UMnyango wezokuThutha KwaZulu-Natal uthi iNkosi Yamagcokama ishonele endaweni yesigameko kule ngozi eyenzeke erobhothini elibhekene nesibhedlela iMelomed eRichards Bay, ku-N2. Ngokuthola kweLANGA, igidangoma elishonile belibizwa ngoGupter Mchunu, naye odabuka eMsinga.
Okhulumela uMnyango wezokuThutha uMnu Ndabezinhle Sibiya, uthe emotweni yalo mculi bebane ngesikhathi kwenzeka ingozi. Uthi ababili bayelashwa esibhedlela. Uveze ukuthi uphiko lwamaphoyisa lusaphenya ngokuholele kule ngozi.
“Ungqongqoshe udlulisa amazwi enduduzo emndenini, nakubathandi bomculo kamaskandi,” esho.
Le ngozi yenzeke ebusuku ngo-12 beya emcimbini iBasadi Music Festival eRichards Bay.
