UNGQONGQOSHE wezoLimo uMnu John Steenhuisen uthi usuqalile umkhankaso wabo wokugomela isifo samatele, ozogxila kakhulu eGauteng naKwaZulu-Natal.
Ungqongqoshe uveze lokhu ngesikhathi evakashele amadele aseKaran Beef Feedlot eHeidelberg izolo ngoMsombuluko, lapho beqale khona ukujova izinkomo kulandela ukufika kwemigomo engaphezulu kuka-900 000 ivela eBotswana ngeledlule.
Uveze ukuthi uhulumeni ubeke eceleni u-R43 million ukuthenga imigomo yokulwa nalesi sifo esibeka engcupheni imboni yenyama ebomvu kuleli. USteenhuisen unxuse abafuyi ukuqikelela kakhulu kunakuqala ukuphepha kwemfuyo yabo ngalesi sikhathi.
“Sinxusa abafuyi nezisebenzi zasemapulazini ukulandela imigomo esiyibekile. Wukubambisana kuphela okuzosisiza ukulawula ukwanda kwesizo samatele. Sibeke imigomo yesikhashana ezolawula ama-auction nokuthuthwa kwezilwane,” esho.
“Kwezinye izindawo kakusavumelekile kukuthutha izilwane ngaphandle kobufakazi bokuthi zigonyiwe nokuthi zihlolelwe amatele, kwatholakala ukuthi kazinawo. Labo abephula umthetho kufanele babhekane nengalo yomthetho ngengoba lesi sifo sibeka engcupheni umnotho wezwe ovela untengantenga.”
