IZIBOPHEZELE ekusebenzeleni umphakathi ngobuqotho nangokwethembeka iMeya entsha yaseMkhanyakude, uMnu Comfort Khumalo, oqokelwe kulesi sikhundla ngoLwesihlanu.
Umhlangano wokuqokwa kobuholi obusha ububanjelwe emahhovisi omkhandlu iBig 5 Hlabisa asedolobheni laKwaHlabisa. UKhumalo uqokelwe kulesi sikhundla ngethikithi le-IFP. Isikhundla angene kusona besiphethwe nguMnu Sphile Mdaka we-ANC.
Kubuye kwaqokwa uMnu Petros Madlopha kwesokuba ngusomlomo walo mkhandlu. Isikhundla sikasomlomo besiphethwe nguMnu Solomon Mkhombo owake waba yimeya yaKwaMhlabuyalingana ngaphambi kokuba ngeyaseMkhanyakude.
UMnu Thembinkosi Sibiya ubuyiselwe kwesokuba yisekela lemeya. UMdaka noMkhombo bakhishwe ngevoti lokungethenjwa kobuholi babo. Emuva kokuqokwa uKhuma-lo ubonge umsunguli we-IFP, iNkosi uMangosuthu Buthelezi, uMengameli wayo uMnu Vele-nkosini Hlabisa nokwethenjwa ngabaholi beqmbu.
Uthe: “Ngibonga ukwethenjwa ngalesi sikhundla. Ngeke ngiphoxe, ngizosebenza ngokwethembeka nangokuzikhandla ukuze kuhanjiswe ngempumelelo intuthuko emiphakathini,” esho.
UMkhombo uthe umhlangano ubungekho emthethweni njengoba yena engaziswanga ngawo.
“Ngokomthetho olawula ukuhlaliswa komhlangano, kufanele ngaziswe kusasele izinsuku ezintathu ukuthi kumele ngibize umhlangano. Uma ngehluleka, kufanele kucelwe imenenja yomkhandlu. Nayo kufanele yaziswe kusenesikhathi esifanayo nakimi. Uma kungaphumeleli lapho, kufanele kubikelwe ungqongqoshe womnyango.
“Nongqongqoshe kumele aziswe kusasele izinsuku ezintathu. Sizokuphonsela inselelo ukukhishwa kwethu. Sizohlala phansi, sibheke amaphuzu emuva kwalokho, sinikele enkantolo. Umhlangano ubungagunyaziwe,” kusho uMkhombo.
I-ANCYL eMkhanyakude naKwaZulu-Natal, ikhiphe isitatimende izwakalisa ukungenami kwayo ngesinqumo esithathiwe. Lolu phiko luphakamisa ukuthi ubuholi baleli qembu buhoxe kuhulumeni wobumbano esifundazweni.
