UHLUKANISWE izigaba ezintathu umbango womaskandi wokuncintisanela umcimbi weMother of All okubekwe kuwona isiteki sekhumbi iToyota Quantum. Lokhu kwethulwe ngokusemthethweni ngoMgqibelo yithimba labahleli.
UMgqugquzeli wawo uMnu Eric Ngobe uthe inhloso enkulu ngokusungulwa kwalo mcimbi ngukuthi lingabi bikho igebe ekuhlomuleni kwabaculi kwabaphumelele nalaba abasazalazayo. Uthi ngalokhu benzela ukunikeza namanye amaciko ithuba lokuzibonakalisa kwiMother of All kuwona wonke amazinga omculo. Kuvezwe ukuthi abalandeli bazoqoka abaculi ngokusebenzisa uhlelo lwe-email bathumele igama lomculi kwethi “Ukmafrica24@gmail.com”.
Ukuqoka umculi omthandayo, kuyavalwa ngoLwesihlanu mhlaka-21 kwephezulu. Omunye wabagqugquzeli uZimiphi “Zimdollar” Biyela uthi banikeza abathandi bomculo okungabalandeli ukuba bazikhethele bona abaculi abafisa bangenele umbango wemoto.
Utshele leli phephandaba ukuthi kuzohlungwa abaculi abawu-50 abazomenyezelwa ngoMgqibelo, okuyibona abazovotelwa ngokohlelo lwe-sms Line nayo ezomenyezelwa ngalo lolu suku. Uthi ngesonto elilandelayo kuzosala i-Top 40 ngokwamavoti, kuphinde kusale i-top 30 okuyiyona ezobe ikowamanqamu kuze kuyofika usuku lomcimbi mhlaka-5 kuMbasa (April) ePeoples Park Moses Mabhida, eThekwini.
“Ukuqokwa kwabaculi kuzovalwa ngo-12 emini ngoLwesihlanu, kuyobe sekuhlala phansi ithimba leMother of All nezazi zomculo kuhlunguwe okuyibona abawu-50 abaculi ngokwamagalelo abo kwezomculo. Kuzoqala kuqhudelane abawu-50, kusale abawu-40 ngokwevoti, kugcine kusale abawu-30.
Lezi zigaba ezintathu zizokwenzeka ngokwevoti, umculi kuzoya ngokuthi uvotelwe kanjani ukuze asale kwi-Top 40, kuya kuTop-30. Nangosuku lomcimbi kuyoculwa ngokwezinamba ukuthi umculi ulale kuyiphi inamba kulaba abawu-30 okuyibona abafike kowamanqamu,” kusho uZimdollar.
Abaculi abangavumelekile ukuqokwa kulo mcimbi, uKhuzani, uGatsheni, uMfiliseni Magubane, u-Ali Mgube, uShwi, uThokozani Langa, uBuselaphi, Izingwe Zamakhize, uGandaganda noThandeka Radebe. UZimdollar uthe laba baculi bazobe beyizimenywa ezizonandisa ngosuku lomcimbi.
“Laba baculi sibaqashile ukuthi babeyizimenywa ezizonandisa, abavumelekile ukuba baqokwe emncintiswaneni,” esho. Uthe inhloso enkulu ngalo mcimbi ngukuthi kuphele iminyaka ewu-10, sekuhlomule baculi abawu-10 amaQuantum.
“UGatsheni akangeneli ngoba nyakenye kuwine yena. Wumthetho esiwubekile ukuthi osehlomulile, udedela abanye emncintiswaneni,” kusho uZimdollar.
Lo mcimbi wesekwe uKhozi FM nephephandaba ILANGA.
mthobisis@ilanganews.co.za
