UMASIPALA weTheku ukhuthaza umphakathi ukuba ugome izinja kulandela isigameko sowesilisa waseZimbokodweni olunywe yinja yakhe ebinamarabi washona. Lenja kubikwa ukuthi ibinezimpawu ezitshengisa ukuthi inamarabi lokhu okubonakale ngendlela ebiziphethe ngayo nolaka ebinalo.
Ngemuva kophenyo obelwenziwa wumnyango weZifo Ezithelelanayo kumasipala weTheku kutholalake ukuthi lo wesilisa walunywa yinja ngoMarch kodwa wafuna usizo lwezempilo ngemuva kwezinyanga ezimbili, igciwane selisabalele emzimbeni.
Lesi sigameko sifuze leso esenzeke ngonyaka owedlule eNgonyameni, lapho kwashona khona ingane eneminyaka emithathu ngemuva kokulunywa yinja enamarabi.
Umasipala weTheku uthi lesi sifo siyingozi kepha siyavikelela, unomkhankaso ohlanganisa iminyango eyahlukene okuhloswe ngawo ukuqeda amarabi makufika unyaka u-2030. Kumanje sebegome izilwane zasekhaya eziwu 385, 372 izinja, amakati awu-13 emkhankasweni wezinsuku ezintathu obuseZimbokodweni kule nyanga.
Izimpawu zamarabi kubantu kungaba ukuphathwa yikhanda, imfiva, ukudideka emqondweni nobuhlungu bamamasela. Umasipala unxusa olunywe noma oklwejwe yisilwane esinamarabi ukuba athole usizo ngokuphuthuma. Isilonda kumele siwashwe ngamanzi ahambayo anensipho bese eya esikhungweni sezempilo. Ukuthola ulwazi ngamarabi umphakathi unxuswa ukuba uxhumane nomasipala ku- 031 328 9300
