Isithombe ngabe: ALS Paramedics
KUSHONE umuntu oyedwa, kwalimala abane ngesikhathi kuwa isikhafula (scaffolding) enxanxatheleni yezitolo eSpringfield Park, eThekwini, namuhla ngoLwesibili ekuseni.
Ngokusho kukaMnu Garrith Jamieson, okhulumela i-ALS Paramedics, izisulu beziphezu komsebenzi wazo ophahleni lwale nxanxathela yezitolo ngesikhathi kwenzeka lesi sigameko.
“Izisebenzi eziyisihlanu bezisebenza ngesikhathi kuwa isikhafula ebezigibele kusona. Besiphakeme ngebanga elilinganiselwa ku-6 metres ukusuka phansi. Ngeshwa kushone umuntu oyedwa, abathathu balimala kabi kanti oyedwa usesimweni esibucayi,” kusho uJamieson.
Uthe izisulu bezilimele ngokwendlela ezishayeke ngayo phansi okubalwa ukushayeka ekhanda nasemzimbeni futhi kungenzeka kube khona ezilimele umgogodla.
