KUSHONE umuntu oyedwa kwanyamalala abathathu ngezikhukhula ezihlasele ogwini nesifundazwe iKwaZulu Natal ngeSonto.
Izimvula ezinamandla zidale umonakalo ezindaweni ezahlukene eMargate ngaphansi kukaMasipala iRay Nkoyeni.
UNdunankulu wakulesi sifundazwe uMnu Thami Ntuli uhambele kulo masipala ukuyohlola umonakalo odaleke ngenxa yalesi simo sezulu esilimaze impahla nengqalasizinda.
UNtuli ekhuluma nabezindaba ukuqinisekisile ukudlula komuntu oyedwa ngenxa yalezi zimvula ezinamandla.
Uthe umonakalo walezi zimvula wenzeke ngesikhathi lapho lo masipala ubusanda kuphothula ukulungisa enye ingqalasizinda eyamoshakala ngezikhukhula ezedlula.
Uqhube ngokuthi ithimba elihlola izinhlekelele lizohlola isimo ngenhlosoyokuthola ukuthi mungakanani umonakalo odalekile futhi uzodla malini ukuwulungisa.
Indawo yaseMargate ugabe kakhulu ngokuheha izivakashi ikakhulukazi ngalesi sikhathi sonyaka.
Ingenye yezindawo isifundazwe egabe ngazo ukuheha izivakashi eziqhamuka ezindaweni ezahlukene nezwe nangaphandle imbala.
Khona manjalo kubikwa ukuthi kutholakala imoto ebihudulwe ngamanzi ngaseManzimtoti okusolwa ukuthi ibihamba abantu abathathu abasathungathwa.
Lolu wudaba oluqhubekayo.
