BHEKI NDLOVANA
USHAQEKILE umndeni kaMafukuzela, uDkt John Langalibalele Dube owayengumengameli wokuqala we-ANC, ngokudlula emhlabeni kukaMnu Zenzele Mfundo Dube (72), ongumzukulu omdala kaMafukuzela.
Kubikwa ukuthi uMnu Dube ushonele esibhedlela iCity Hospital eThekwini, ngoMgqibelo, emuva kokubanjwa wukugula.
Omunye wabazukulu bakaMafukuzela, uMnu Langa Dube, utshele ILANGA ukuthi kubashaqisile ukudlula emhlabeni kukaZenzele ngoba bebenethemba lokuthi uzolulama, aphume esibhedlela.
“Besizitshela ukuthi uyelulama ngoba ubeseqala nokudla,” kusho uMnu Dube.
UMnu Dube (Zenzele) uzalwa ngowayeyindodana endala kaMafukuzela, uMnu Sobantu Douglas Dube, kanti unina kwakungu-Agnes, uLaMasuku.
Ngemuba kokudlula emhlabeni kukaZenzele, umndeni uhlanganile, ukuze kuhlelwe amalungiselelo omngcwabo. UMnu Dube (Langa) utshele leli phephandaba ukuthi bathathe isinqumo sokuthi umufi afihlwe ngoMgqibelo.
Uthe inkonzo yomgcwabo izokwenzelwa eJohn Dube Stadium khona oHlange, eNanda. Uhlelo lwenkonzo luzoqala ngehora leshumi ekuseni, bese efihlwa emathutheni omndeni khona oHlange.
UMnu Dube (Langa) uthi bazomkhumbula kakhulu uZenzele ngamagalelo akhe emzabalazweni njengoba esebenze kakhulu kwi-ANC.
Ngaphandle kwepolitiki uke waba ngusomabhizinisi ngaphambi kokuba athathe umhlalaphansi.
Ushiye emhlabeni abantwana bakhe abathathu uCira, Sya, noZweli.
Kulindeleke ukuba i-ANC ithumele ithimba elizoya kobhonga emswaneni emndenini wakwaDube.
