LIBASHONELE “osomabhizinisi” abangabokufika kuleli abawu-21, abashaqwe yithimba ebeliphelekezela uNdunankulu waKwaZulu-Natal, uMnu Thami Ntuli, eligasele ezitolo abadayisa kuzona bengazelele, ngoLwesine emini.
UNtuli nethimba lakhe bebehamba nezikhulu zoMnyango wezaseKhaya, namaphoyisa kaMasipala weTheku, ngesikhathi begasela ezitolo ezisenkabeni yeTheku, emgwaqweni uDkt Pixley kaSaka Seme.
Phakathi kwezinto abazitholile kulezi zitolo, ngamaphakethe kagwayi ongalungele ukuthi ubhenjwe ngabantu, ugologo ungahluziwe, nemali yomgunyathi. Baphinde bathola ukudla osekuphelelwe yisikhathi, kusagcinwe emashalofini, nokunye okubolile.
“Lokhu kuwubufakazi bokuthi makuqiniswe emingceleni engenela kuleli zwe. Laba bokufika esibabophe lapha, abanye abanawo amaphephamvume okuba babe kuleli zwe, abanye awabo asephelelwa isikhathi.
“Abanye abanazo nhlobo izimvume zokuba kuleli zwe, kodwa baqhuba amabhizinisi. Siyawucela umphakathi wakulesi sifundazwe ukuthi ubambisane nathi siwuhulumeni ngoba ukuba khona kwabokufika abangeamvume yokuba kuleli, kuyasilimaza.” Laba bokufika baboshiwe,” kusho uNtuli.
