SKHOSIPHI MTHEMBU
KUSOLWA ukulwa “nogombela kwezabo” abaqhwaga imisebenzi kahulumeni yokwakha emphakathini mayelana nowesilisa odutshulwe wabulawa eCornubia, eThekwini, ngoLwesine. UMnu Xolani Chala (42) (osesithombeni) udutshulwe wafa, kwalimala kabi omunye wesilisa abenaye, ophuthunyuswe esibhedlela.
Kuthiwa uChala ubenowesilisa abesizana naye kwamakhelwane, bakha indlu ngesikhathi kuqhamuka abantu abangaziwa, bavulela ngenhlamvu bebhekise kubona.
Ukuchitheka kwegazi eCornubia sekuyinsakavukela umchilo wesidwaba njengoba ukubulawa kwabantu kwenzeka amasonto elandelana. Ngeledlule kudutshulwe kwabulawa owesifazane esemzini wakhe, ehleli nezingane zakhe ezimbili, kuyona le ndawo.
Mayelana nesigameko sangoLwesine, umthombo weLANGALempelasonto okuleya ndawo, ulihlebele ukuthi uChala udutshulwa nje, ubesanda kuhlela umbhikisho endaweni wokulwa nabantu abangogombela kwezabo, abanika abangani babo imisebenzi yasemphakathini.
Uveze ukuthi endaweni kunezinhlelo ezihlanganisa ukwakhiwa kwezindlu zomxhaso. “Into eyenzekayo wukuthi kuneqeqebana elithile eselingogombela kwezalo, elithola imisebenzi lapho kwakhiwa khona izindlu. Uma seliyitholile, liqasha abangani balo nabantu okungebona abendawo. Lokhu bekuwunenga umphakathi. UXolani nabanye bebeyingxenye yokuhlelwa kombhikisho wokulwa nalo mkhubha,” kusho umthombo.
Uthi emuva kombhikisho, kube nomhlangano phakathi kwabebebhikishelwa namalungu omphakathi – kubalwa nomufi – ukuzama ukuthola isixazululo.
Umthombo uthi lowo mhlangano uphele sekuxatshwana.
Okhulumela amaphoyisa KwaZulu-Natal, uLt-Col Robert Netshiunda, uthe kuvulwe icala lokubulala nelokuzama ukubulala, uphenyo lwamaphoyisa luyaqhubeka.
