KUBIKWA ukuthi ubephila buthebelele ngesikhathi esengaphakathi ezikhindini umfundisi wodumo uTimothy Omotoso ogcine ngokuphuma phambili emacaleni abebhekene nawo awodlwengula abesifazane ababesonta ebandleni lakhe.
Ngeledlule iNkantolo ePhakeme yaseGqeberha yamkhipha phambili u-Omotoso emacaleni awu-32 abebhekene nawo okubalwa kuwo awokudlwengula nawokushushumbisa abantu.
Le nkantolo yamkhipha phambili u-Omotoso nalabo abesolwa nabo uLusanda Sulani noZikiswa Sitho.
Kuzokhumbuleka ukuthi laba baboshwa ngo-2017 ngala macala njengoba kuthathe iminyaka ewu-8 ukuqulwa kwawo.
Umbiko wekhethelo we-eNCA usuveze ukuthi u-Omotoso ubephila ntofontofo engaphakathi ejele ngesikhathi kuqulwa leli cala njengoba anqatshelwa ibheyili.
Lo mthombo wezindaba uveze ukuthi iphoyisa ebeliphenya amacala abebhekene nalo mfundisi liveze ukuthi ubenomakhalekhukhwini wakhe futhi enomabonakude ekhulukuthu lakhe.
Leli phoyisa liphinde laveza nokuthi u-Omotoso ubengakudli nokudla kwasejele njengoba ebezidlela okwakhe okuqhamuka ngapohandle.
Kuzokhumbuleka ukuthi uCheryl Zondi ongesinye sezisulu zika-Omotoso wathola okukhulu ukwesekwa ngesikhathi ethula ubufakazi obabuqoshwa bukhoma kumabonakude.
