UNCOME ubuqhawe nokuzinikela kwamaphoyisa ombutho iSouth African Police Service (SAPS) uMnu Paul Mashatile, oyisekela likamengameli wezwe, ngesikhathi kukhunjulwa amaphoyisa awu-27 abulawe esemsebenzini, esikhathini esingangonyaka esedlule.
Lesi sikhumbuzo saminyaka yonke senziwa njalo ngeSonto lokuqala kuMandulo (September), ezindlini zombuso ePitoli. UMashatile uthe bekumele kufike uMengameli Cyril Ramaphosa kulo mcimbi kodwa wathumela yena ngenxa yokuba batasa nezinye ezinto ezimqoka, ezithinta izwe.
“Umengameli uthe mangimdlulisele amazwi enduduzo emindenini nasezihlotsheni zamaphoyisa adlulile. Ngifuna nazi ukuthi laba esibakhumbula lapha bangamaqhawe ngoba banikele ngempilo yabo bevikela izwe lethu kwizigilamkhuba,” esho.
Unxuse amaphoyisa ukuthi engafi ephethe izibhamu zawo, azisebenzise ukuzivikela uma izigebengu ziwahlasela. Uthe angu-66 esewonke amaphoyisa abulawe yizigilakhuba eminyakeni emibili edlule.
“Ngifisa sengathi lo mcimbi singaweqa, ungabi khona okungenani noma iminyaka emibili. Lokhu kuzokube kungasho ukuthi asikho isidingo sawo, kodwa ngoba lizokube lingekho iphoyisa elibulawe lisemsebenzini.”
