KUSAPHAZEKE imfucuza ngaphandle kwamahhovisi kaMasipala waKwaDukuza aseBallito, kulandela isiteleka senyunyana iSouth African Municipal Workers Unon (Samwu), esiqale ngoMsombuluko.
IBallito, ngelinye lamadolobha athuthuka ngesivinini KwaZulu-Natal, futhi lidume ngokuheha izivakashi ngoba ligudle olwadle, futhi lihlanzekile.
Amalungu eSamwu akhala ngokungakhokhelwa imali yomsebenzi wamahora ngeziwe (over time), ukungakhushulelwa ezikhundleni, nokuthi abaphathi kabazigcini izivumelwano okwafinyelelwa kuzo ngesikhathi kunezingxoxo.
UMnu Deon Viljoen, weDolphin Coast Residents and Ratepayers Association, uthi ukungcola okudalwe yile mibhikisho, kubeka impilo yabantu engcupheni ngoba kuyanuka, futhi kungadala izifo.
Abantu abathenga izindawo eBallito, ngabavela kwamanye amazwe nakwezinye izifundazwe. UMnu Sifiso Zulu, okhulumela uMasipala waKwaDukuza, uthi balutholile uhlu lwezikhalazo oluvela kwiSamwu, wathi basalucubungula.
“Siyayinxusa ISamwu ukuthi ize izokhuluma nathi siwumasipala. Siyafisa ukuthi kutholakale isixazululo, impilo iqhubeke, ngoba mkhulu umonakalo osudalekile selokhu lesi siteleka siqalile,” esho.
Nasedolobheni KwaDukuza, eShakaskraal, naseSalt Rock, amalungu eSamwu awakwazanga ukuqoqa udoti obekwa emgwaqeni, njengoba izimoto ezithutha udoti bezipakiwe, kungasetshenzwa.
