UZOSONDEZA ezinye izinhlobo zomculo emgubhweni wakhe umculi kamaskandi ozobe ehlanganisa iminyaka ewu-15 ekule ndima. UKhuzani “iNdlamlenze” Mpungose uthi nakuba umgubho wakhe uqondene nabalandeli bakhe iBlue Nation kodwa amanye amaciko uwanxusile ukuba abenaye ngalolu suku.
Uthi ngenxa yokuthi empumelelweni yakhe kukhona namanye amaciko abebambisene naye ngokomculo
nangokwemibono, ubone kukuhle ukuba nawo awameme kulo mgubho.Umgubho wempumelelo yakhe yeminyaka ewu-15 kwezomculo uzokuba mhla ka-22 kuNdasa (March) eCarnival City, eGoli.
“Ukuphumelela kwami kuhlanganisaabantu abaningi. Ngakho-ke zonke izinhlaka ezibambe iqhaza
ekuthuthukisweni komculo wami, zizoba yingxenye yalo mgubho. Baningi nabaculi abangaculi umaskandi
nabesibambisene nabo selokhu ngaqala nakuba abanye sitholane ngendlela kodwa umsebenzi wethu
wokujabulisa abantu siwenze sibambisene,” kusho uKhuzani.
Utshele leli phephandaba ukuthi phakathi kwabaculi abazobe bekhona kulo mgubho, kubalwa uBig Zulu, uMnqobi Yazo noMjolisi, uDj Tira, iBlack Diamond, uJumbo nabanye. “Ukuphumelela kwami akuhlanganisi omaskandi kuphela, kodwa
nabanye abangawuculi bangesekile,” esho.
Abaculi bakamaskandi abamenyiwe kubalwa kubona uGatsheni, uFalabo, noLimit. “Ngiyacela abantu ukuba baphuthume
bathole amathikithi ngoba le ndawo esizokwenzela kuyona umcimbi, imumatha umthamo wabantuabancane kakhulu. Zikhona izipesheli zamathikithi,” kusho uKhuzani.
Amathikithi atholakala eShoprite, eComputickets naseTickets Pro ngo- R200.
mthobisis@ilanganews.co.za
