UMNYANGO wezaseKhaya ukhombe indlela izisebenzi zawo eziyisithupha ngoxhaxha lwamacala okukhwabanisa nenkohlakalo.
Kubikwa ukuthi ukuxoshwa kwalezi zisebenzi kuqhamuka ngemuva kohlelo lukahulumeni lokulwa nenkohlakalo nokungaziphathi kwezisebenzi zikahulumeni.
Kusukela kuqale lolu hlelo lokulwa nenkohlakalo ezinhlakeni zikahulumeni ngo-July nyakenye sekuxoshwe izisebenzi zikahulumeni eziwu-33 kanti kunezinye esezithole izincwadi zesexwayiso zokugcina.
Ngaphandle kokukhonjwa indlela kwalezi zisebenzi eziwu-8 sezibhekane namacala futhi zagwetshwa iminyaka eyahlukene zibhadla ejele kusukela izinyanga ezine kuya kweziwu-18.
Ihhovisi likaNgqongqoshe wezaseKhaya liveze kulezi zisebenzi ezixoshiwe eziwu-19 zibhekene namacala asenkantolo njengoba zilindele ukushushiswa.
Lolu hlelo luhlanganisa uhlaka olusanda kusungulwa iBorder Management and Immigration Anti-Corruption Forum eyakhelwe ukuqinisa ukusebenzisana phakathi koMnyango wezaseKhaya, iBorder Management Authority (MBA), Special Investigating Unit (SIU) neNational Prosecuting Authority (NPA).
UNgqongqoshe walo mnyango uMnu Leon Schreiber ukuncomile ukusebenz ngokubambisana kwalezi zinhlaka njengoba eveze ukuthi kukhombisa ngokusobala ukuzomisela komnyango wakhe ukulwa nenkohlakalo kuwona.
