UMNYANGO wezeMpilo usukhiphe isexwayiso ngamakhondomu awumgunyathi asesababelele kuleli njengoba unxusa umphakathi ukuthi uhlale umehlomane futhi ubike uma kukhona abawabona esolisa.
Ngokubika kweSABC ibamba lePhini loMqondisi Jikelele kulo myango elibhekelela izinhlelo zezempilo uRamphelane Morewane uthe udaba lwala makhondomu luqale ukusabalala ngesikhathi samaholidi kaDecember.
Uthe baqale ukuzwa kukhulunywa ngawo ngoDecember kanti sebeqala ukukhathazeka njengoba egcwele kakhulu esifundazweni iGauteng.
Unxuse umphakathi ukuthi uthembele kakhulu kumakhondomu akhiqizwa wuhulumeni njengoba etholakala kuzona zonke izindawo zezempilo kuleli nalezo ezigcwala umphakathi.
Uxwayise ngokuthi abantu bangathengi amakhondomu kunoma iziphi izindawo eziwathengisayo njengoba ziningi kodwa eziwadayisayo kodwa amanye awo awugunyaziwe ukuba athengiswe kuleli.
Uqhube ngokuthi uma kukhona isidingo sokuthi bathole amakhondomu kungakuhle bathembele kulawo kahulumeni.
UMorewane uthe basebenza nezinkampani ezizimele ukuzama ukuqinisekisa ukuthi bayawanqanda la makhondomu angaze asabalale izwe lonke ngoba angase abe nobungozi futhi abeke impilo zabantu engcupheni.
