KUXWAYISWE abadlali beqembu lesizwe iBafana Bafana ngokubaluleka kokuthola usizo ngezimo ababhekana nazo empilweni, lokhu kushiwo yisikhulu esiphezulu enhlangwaneni eyengamele ibhola kuleli uDanny Jordaan oyisikhulu esiphezulu kwi-SAFA.
Ukusho lokhu ngesikhathi kuqhubeka umngcwabo ka-Jayden Adams (25) obengumdlali we-Mamelodi Sundowns neBafana Bafana ofihlwe ngoMgqibelo eStellenbosch, eWestern Cape emuva kokuthatha umphefumulo wakhe nokuyikhona okwenze uJordan wabona kufanele abadlali bakuleli bathole ukwelulekwa ngokwengqondo.
Lo mngcwabo bewuhanjelwe ngabanye babadlali beSundowns nabeqembu lesizwe kuhlanganisa nomqeqeshi walo uHugo Broos ochaze lo mdlali njengomunye obeyinsika eqenjini lakhe.
Isikhulu seSundowns uThlopie Motsepe, sincome lo mdlali ngeqhaza alibambile ekilabhini.
“Siyabonga ngesikhathi sakho esibe naso nawe sizokukhumbula ngokuhlala njalo umametheka,” esho.
Kuthiwa umgcwabo walo mdlali ukhokhelwe yikilabhu yakhe edume ngokuba ngomacaphuna kusale ebholeni lakuleli.
Ukufa kwalo mdlali kushiye abantu abaningi bedidekile njengoba kusolwa ubudlelwane bakhe njengembangela eyenze wakhetha ukufulathela leli.
Kwenzeke lokhu nje lomdlali ubesanda kushiwa nangugogo wakhe nokungenye yezinto okuthiwa imzwise ubuhlungu kwazise akakwazanga ngisho ukuzobeka ithambo lakhe ngenxa yokuba semdlalweni neBafana ebidlala kwi-Ndebe yomhlaba.
