AYALWE ngokubaluleka kokwethembeka emakhaya awo, emphakathini nasemabandleni akhonza kuwona amadoda engqungqutheleni yawo ebibanjelwe eDamaseku Christian Centre, eNkomeni, eNgwavuma, ngoMgqibelo.
Abaholi bemikhakha eyahlukene, ikakhulukazi abezenkolo, bebeshiyelana inkundla kulo mbuthano, obekukhona kuwo abesilisa iningi labo eselilungele ukuganwa. UMphostoli Lindizwe Msimang uthe injongo enkulu yokuhlanganisa abesilisa bekuwukuyobakhumbuza ngezifiso zikaNkulunkulu ngokudalwa kwabo.
“Lapha kuzokwakhiwa indoda. Sifuna ukuthi inkolo iqhutshwe ngamadoda aqotho. Indoda kufanele ibe yisibonelo esihle kusukela ekhaya kudlulele ebandleni ekhonza kulona, kanjalo nasemphakathini,” kusho uMsimang.
UMfu Samuel Nhlabatsi, ongowokudabuka eSwazini, ozinze kuleli ngokuthunywa yibandla aliholayo iVangelical Church, uyale amadoda ngokwenkolo.
“Indoda kufanele ibe ngethembekile – ithembeke kumkayo, ithembeke ezinganeni zayo. Indoda kufanele ithembeke ngisho nangokomnikelo wayo ebandleni ekhonza kulona, nangokweshumi. Ziningi izithelo zokwesaba nokuthembeka kuNkulunkulu. Sinalo ithemba lokuthi ukuhlangana ngalolu hlobo kuzothela izithelo ezinhle ngisho nakubaholi bamabandla,” kuyala uNhlabatsi.
Omunye wabaholi abangene esiteji kwachwaza inkundla nguMphostoli Wonder Myeni, ongumsunguli we-Emmanuel Zoe Ministry, okhuthaze abesilisa ukuba bahlale ngokuzihlola ubudlelwano babo noNkulunkulu.
“Indoda iyanamathela ezimisweni emiselwe ukuba ihambe kuzona, kayigudluki. Kulabo abasazongena emishadweni nabantu besifazane kufanele bayazi into abayingenelayo futhi bahlale ngokukhuleka,” kuphetha uMyeni.
