BHEKI NDLOVANA
ISIZE yasukunyelwa indaba “yesicefe” sezingcingo ezingenamkhawulo nemiqhafazo ethunyelelwa abathengi, ivela ezinkampanini ezisuke zidayisa imikhiqizo. Sekuthathwe isinyathelo sokuba kwenziwe isichibiyelo emthethweni ovikela abathengi, iConsumer Protection Act, ukuze bavikelwe kule nkinga osekunesikhathi eside kukhalwa ngayo.
Lesi sichibiyelo sizovimbela izinkampani ezidayisa imikhiqizo ukuba zingaveli zifonele umuntu, noma zimthumelele umqhafazo uma engakuthandi lokho. Sizohambisana nokwethulwa kwebhuku elibizwa nge-OPt Out Registry, abathengi abazobhalisa kulona uma bengafuni ukuthola lezi zingcingo nemiqhafazo. Kanjalo futhi nezinkampani kuzofanele zibhalise, bese zenza isiqiniseko sokuthi kazixhumani nomuntu ongadingi ukuba zixhumane naye.
UMnu Parks Tau (osesithombeni) ongungqongqoshe wezohwebo, ezezimboni nezokuncintisana, usanda kushicilela isaziso mayelana nalesi sichibiyelo esihlongozwayo, kanti kunxenxwa umphakathi ukuba ubeke imibono ngaso. Nezinye izinhlaka ezithintekayo, zimenyiwe ukubeka imibono yazo.
Ukuthunyelwa kwemibono kuzovalwa mhla ka-15 January ngonyaka ozayo. Abanemibono bangayithumela emnya-ngweni kuMnu Sibusiso Sasayi, ekhelini elithi: Private Bag X 84, Pretoria, 0001; noma nge-email ethi: SSasayi@thedtic.gov.za.
