ISILOMO somculi uVusi Nova sizobe senza ezibukwayo emcimbini waso ozobe use-Emperors Palace, eGoli mhla ka 1 May ozobe ubophele nangezinye izihlabani okubalwa kuzo uKelly Khumalo, uNathi Mankayi, uZuko SA, uKwanda ne-047.
Echaza ngalo mcimbi uVusi Nova uthe inhloso enkulu ukwenza umcimbi ongasoze wakhohlweka futhi obungaza amasiko nobuciko baseNingizimu Afrika. “Ngifuna ukwenza into yamehlo. Ngifuna abantu bazizwe bekhethekile, bagqoke kahle bathokozele umculo. Lo umgubho wamagugu, umculo namasiko,” esho.
Uthembisa ukuthi lo mgubho kuzoba owaminyaka yonke lapho abantu bezogqoka khona baconse. “Ngijabule kakhulu ukuthi ngizochitha isikhathi nabalandeli bami, ngiqale isiko elisha lokubungaza amagugu nomculo wethu,” esho.
Kwabanye babaculi azobe eshikisha nabo esiteji wenze izingoma nabo enoKelly Khumalo ethi Zungandithembi, enoZuko SA ethi Andikalibali,enoNathi Mankayi, i-047 noKwanda ethi Ndivumeleni.UMpho Popps noBrenda Ngxoli bazobe bephethe uhlelo lo mcimbi.
UVusi Nova uzenzele igama ngezingoma phakathi kwazo okubalwa iNdukuthandile, Asiphelelanga, Yibanathi, Thandiwe, I’d Rather Go Blind nezinye eziningi.
